مسیهئے بێکِبریا بزورێت
2
نون اگن شمارا گۆن مَسیها هۆر بئیگئے سئوبا دلبڈّیَ رسیت، اگن شمارا چه آییئے مِهرا آسودگیَ رسیت، اگن شمارا چه پاکێن روها همدلیَ رسیت و اگن شمارا همدردی و رَهم هست،
2 گڑا تِپاک ببێت، بێگَرَزێن مِهرێئے واهُند ببێت، اَرواها یکّ ببێت، همپِگر ببێت و اے پئیما منی شادمانیا سرجم و کامِل بکنێت.
3 هچّ کارے په وتواهی و وتپسُندی مکنێت.
په بێکِبری و دربێشی دگران چه وت بُرزتِر سرپد ببێت.
4 هرکَس وتی نَپ و سوتّانی بدلا، دگرانی نَپ و سوتّانی هئیالا بداریت.
5 شمئے هئیال کنگئے وڑ و پئیم هما ببیت که ایسّا مَسیهئے بوتگ.
6 آ، هُدائے زاتئے درۆشما اَت،
بله گۆن هُدایا اے هَمدرۆشمی، آییا په وت کَٹّ و پائِدگے هساب نکرت و
7 وتی شان و شئوکتی یله دات و
گُلامێئے درۆشُمی زُرت و
انسانێئے شِکلا پێدا بوت.
8 جِندی که انسانئے شِکلا اَت،
وتا بێکِبر و دربێشی کرت و
تان مَرکا پرمانبردار اَت،
تان سَلیبئے سرئے مَرکا هم.
9 پمێشکا هُدایا آ، سَرپراز کرت و
انچێن نامے آییارا دات که چه هر ناما بُرزتِر اِنت،
10 که هرکَس ایسّائے ناما کۆنڈان بکپیت،
آسمانا هم، زمینئے سرا هم و زمینئے چێرا هم،
11 و هر زبان بمَنّیت و بگوَشیت:
”ایسّا مَسیه هُداوند اِنت“
که هُداێن پتا شان و شئوکت بِرسیت.
چۆ اِستارا بدرَپشێت
12 پمێشکا منی دُردانَگان!
اَنچش که شما مُدام پرمانبردار بوتگێت، نه تهنا آ وهدا که من شمئے کرّا اَتان، اَنّون هم که من اۆدا نهآن، انگت گێشتر پرمانبردار اێت.
گڑا په تُرس و لَرز وتی نجاتئے رُست و رُدۆمئے جُهدا بکنێت.
13 چێا که اے هُدا اِنت که شمئے دلانی تها کار کنگا اِنت که شمئے ارادهان و شمئے کاران په وتی نێکێن مکسدا سرجم بکنت.
14 هرچے که کنێت، بے نُرُنڈگ و بے دَپجاکا بکنێتی
15-16 که شما پاک و بےائیب بمانێت.
چۆٹ و کَجراهێن پدرێچێئے نیاما هُدائے بێمئیارێن چُکّ ببێت و ”زِندئے گالا“* مُهر بدارێت و چۆ اِستارا جهانا بدرَپشێت.
آ وهدا، مَسیهئے آیگئے رۆچا پَهر بستَ کنان که من مُپتێن تَچ و تاگے و بےآسرێن جُهدے نکُرتگ.
17 بله هما هِزمت و کُربانیگ که شمئے باوَرئے بَر و سَمر اَنت، اگن آیانی سَرا منی هۆن هم رێچَگی کُربانیگێئے* پئیما رێچَگ ببیت، من گَلَ بان و گۆن شما سجّهێنان شادکامیَ کنان.
18 گڑا شما هم همے ڈئولا گۆن من گَل ببێت و شادهی بکنێت.
کاسِدئے رئوان دئیگ
19 بله من هُداوند ایسّائے اُمێتا تیموتاووسا زوتّ په شما رئوانَ دئیان که منا هم گۆن شمئے هالئے رسگا دلبڈّی برسیت.
20 چێا که منا دگه چشێن همدلێن مردمے نێست که په دل و سِتک شمئے هئیالا ببیت.
21 اے دگه سجّهێنان ایسّا مَسیهئے کار اِشتگ و وتی جندئے نَپ و سوتّانی رندا کَپتگاَنت.
22 بله شما وتَ زانێت که تیموتاووسا لاهکی پێش داشتگ.
آ په وشّێن مِستاگئے شنگ کنگا گۆن من انچش همکۆپگ بوتگ که چُکّے گۆن پتا.
23 پمێشکا، انچش که من سَهیگَ بان که منی هال چے بیت، منا اُمێت اِنت که آییا زوتّ دێم داتَ کنان.
24 من دلجم آن که هُداوند راهے پچَ کنت و منی جند هم زوتَّ کئیت.
25 بله منَ گوَشان زلوری اِنت که من اِپاپْرۆدیتوسا پدا شمئے کِرّا دێم بدئیان که آ، منی برات و همکار و همکۆپگێن جُهدکار و شمئے کاسِد اِنت که شما په منی زلورتانی پوره کنگا دێم داتگ.
26 چێا که آ، په شما سجّهێنانی دیدارا هدۆناک اِنت.
پرێشان اِنت که شما آییئے نادراهیئے هالا سهیگ بوتگێت.
27 اے راست اِنت که نادراه اَت، مَرکیگ اَت، بله هُدایا آییئے سرا رهم کرت.
تهنا آییئے سرا نه، منی سرا هم رهمی کرت که منا گَمئے چَکّا گَمے مرسیت.
28 پمێشکا من آییئے واترّ دێم دئیگا سَکّ هدۆناک آن که وهدے شما پدا گندێتی، گَل ببێت و منی پرێشانی کمتر ببیت.
29 گڑا په هُداوندئیگی آییا په گَلے وشّاتک بکنێت و آییئے ڈئولێن مردمان اِزّت بدئیێت.
30 چێا که آ په مَسیهئے کارا مِرَگی بوتگ.
وتی ساهئے پَرواهی نداشت تانکه شمئے هما هِزمتانی کَمّیا پوره بکنت که شما په من کرت نکرتگاَنت.